Love Mo Ba si Nanay?

Katulad ng isang relationship ng magkatipan, ang relationship ng mag-ina ay  hindi perfect. May away, may tampuhan, o may mga kumplikadong bagay na siyang dahilan para lumayo ang loob ng anak sa kanyang ina. Subalit, matitiis ba ng isang ina ang kanyang anak?

Nagagalit ka sa nanay mo kasi OFW siya. Wala siya sa mga araw na nagdadalaga o nagbibinata ka. Wala siya para suportahan ka sa mga problema mo. Nagagalit ka kasi DH lang siya sa Singapore o

Hongkong? Lagi mong sinasabi na pera lang ang naibibigay niya sa’yo at hindi ang pagiging isang ina.

Gumising ka!

Hindi biro ang ginawa niyang sakripisyo para manilbihan sa ibang bansa. Naisip mo ba kung nahihirapan siya? Naisip mo ba kung paano niya nalalabanan ang homesick? Naisip mo ba na halos di na siya natutulog para makapagpadala lang ng pera sa’yo?

Umalis siya kasi kailangan. Ayaw niya na danasin mo ang hirap na naranasan niya. Umalis siya para sa’yo pero anong ginawa mo? Ikinulong mo ang sarili mo sa malaking pagtatampo. Nagtatampo ka sa dahilang ikaw lang ang nakakaunawa.

Bakit di mo siya pasalamatan para kahit paaano maramdaman niya na masaya ka dahil siya ang naging ina mo. Ayusin mo pag-aaral mo para balang araw umuwi na si nanay. Dumating ang araw na hindi na siya magsisilbi sa ibang tao kasi ibibigay mo na lahat ng pangangailangan niya.

Nanay, mama, ina, mommy, mamita o anu-ano pa ang ginagamit para tawagin ang isang ina. Naalala mo ba nung mga araw na inaalagaan ka niya? Pinapaliguan o hinahatid sa eskwela?

Hindi mo maalala?

Kasi ang naalala mo kung paano mo sigaw sigawan ang nanay mo. Kung paano mo siya pagalitan sa mga nagawa niyang kamalian.

Matanda na kasi si nanay kaya walang laban sa masasakit na salitang ibinabato mo sa kanya. Kulang na lang buhusan mo siya ng tubig sa tindi ng galit mo sa kanya.

Naiinis ka kasi mabaho na siya.

Wake up!

Bakit di mo isipin kung paano ka niya alagaan noong bata ka pa lamang. Ilang beses ka niyang bihisan para lagi kang mabango. Gusto niya bago lagi ang lampin mo. Gusto niya kumakain ka ng mga masasarap na pagkain.

Pero ngayon, tinitipid mo siya. May pamilya ka na kasi kaya yun ang priority mo. Gusto mo mga kapatid mo na ang mag alaga sa nanay mo. Nagagalit ka pa kung humihingi siya ng pera sa’yo.

Sana maisip mo na baka naglalambing lang si nanay. Kasi naman mula ng mag asawa ka nakalimutan mo na siya. Hindi ka na dumadalaw sa bahay n’yo.

Sana tuwing Mother’s Day umuwi ka naman. At kung malayo ka tawagan mo siya para maging happy si nanay. Hindi naman mahalaga kung may gift ka sa kanya o wala. Ngiti mo lang o marinig niyang tumatawa ka masaya na siya. Kasi love ka niya. Tandaan! Kahit minura mura mo pa siya noon hindi siya galit sa’yo – nagtatampo lang!

Nagagalit ka ba sa nanay mo kasi mahirap lang kayo?  Naiinis ka kasi iniwan kayo ng tatay nyo? Bakit ka naman magagalit? Kasalanan ba niya kung naging single mom siya? Kung nagsisisi siya sa nakabuntis sa kanya – kailanman di niya pagsisisihan na naging isang ina siya.

Tandaan mo ‘yan!

Naalala mo ba ang masasayang araw na inaalagaan ka ng nanay mo? Mga araw na ang saya saya mo kasi may nanay ka; may nagluluto ng breakfast mo, may naghahatid sa’yo sa school, at may isang ina na pinaramdam sa’yo ang lahat ng klase ng pagmamahal. Mula bata hanggang sa lumaki ka nadiyan siya para sa’yo. Hindi mo yun makakalimutan diba?

Pero si nanay nasa langit na. Paano mo pa ipapakita na maganda na ang buhay mo ngayon? Hindi mo na rin maibibigay ang hinihingi niyang regalo. At hindi na niya makikilala ang magiging apo niya sa’yo.

Parang kailan lang nang kausap mo siya pero ngayon di mo na siya nakikita. Pero ito ang tandaan mo, nasaan man siya mahal na mahal ka niya.

Ituloy mo ang buhay mo kasi gusto ni nanay maging maayos ang buhay mo. Kahit wala na siya. Gusto niya masaya ka at ituro mo sa mga anak mo kung paano maging isang mabuting tao.

Kung nabubuhay pa ang nanay mo huwag mong sayangin ang oras. Iparamdam mo sa kanya na mahal na mahal mo siya. Katulad ng mga pagmamahal na ipinakita niya sa’yo. Matanda na rin si nanay, huwag mo na siyang sigawan kasi masasaktan siya.

Kung magagalit siya kasi sumasagot ka sa kanya ibig sabihin nun hindi niya nagugustuhan ang pagsagut sagot mo sa kanya.

Oo, mahirap maging perfect. Mahirap maging isang ina. Pero, kahit ano pang pagkakamali o pagkukulang nanay mo pa rin siya. Ipakita mo na hindi pa huli ang lalat – magpasalamat at humingi ng tawad sa kanya.

Madrama ba?

Tandaan mo, mahirap maging isang ina. At kung babae ka, balang araw mararanasan mo din kung paano maging isang ina.

Kung OFW ang nanay mo, kung nagtitinda lang ng mani sa palengke, o simpleng may bahay dapat ipakita mo na ipinagmamalaki mo siya. Kahit mahirap ang buhay dapat puno ng pagmamahalan.

May tampuhan kayo? Ilang buwan na kayong di nagpapansinan? Bakit di ka lumapit? Magpakumbaba ka kasi matatanggap ka niya. Nagtatampo lang yon!

“Hindi masama kung pasasalamatan mo ang iyong ina. Ipakita mo sa kanya na siya ang pinaka-special na babae sa buhay mo. Katulad ng pagmamahal na ipinakita niya sa’yo.” – jondmur

Originally written by jondmur

Photo: from Google -